هُمّا دولا.. هُمّا هُمّا..ولا دولا ناس تانيين؟!
وهو احنا ..زى ما احنا ..ولا احنا مش عارفين؟!
مش هو ده اللى كان بيقول المصرى ايدك منه؟
بأمارة ايه دلوقتى يقول المصرى من اجدع منه؟
عادل إمام..وكمان حسام..وبلاش سيرة تمّورة
يعنى الأفلام..والانسجام..ومعاهم كمان الكورة
وهُمّا دولا.. هُمّا هُمّا..ولا دولا ناس تانيين؟!
هو مين كان ايه ومين كان فين قبل خمسة وعشرين؟!
بعد التحية وقبل الكلام لازم تتحيا الثورة
"أحب أبارك للشباب ونهنِّى نفسنا..واللهِ
كنا من غيركم ومن غير حلفان كلنا هنروح فِطيس
والفضل كله طبعا راجع لسيادة الرئيس.."
مش هو قالها ولا ايه..ولا قالها حد تانى؟!
وهُمّا دولا.. هُمّا هُمّا..ولا دولا ناس تانيين؟!
ويقولك الكل اتغير..أصل احنا بعد ثورة
واللهِ كلام معقول..شاى على حسابى للبيه
كليك كوبى..كليك بيست..فى أسهل من كدة ايه؟!
قولى على أسم واحد حقيقى واثق فيه؟!
دولا ودوكهوما ايد واحدة..والأيد التانية فين؟
اٌمّال مين اللى بيلعب..ولا حدّ غير الإتنين؟!
الثورة ثورة..لأ ثورة..بس الثورة رايحة لفين؟
مين اللى بيلعب من برة..وجوة بيلعب مين؟!
مين اللى بيسبُك فى الضلمة واحنا ولا حاسّين
العقل زينة فى الڨاترينة..والڨاترينة كلها عقول
كل اللى عانده حاجة بيقولها..واللى ماعندوش بيقول
وسيبك م اللعب وفهمنى..هو احنا متفقين؟
الثورة على ايه وعلى مين والسكة الصح منين؟
جمهور مش راضى..وملعب فاضى..وفين القاضى وفين القوانين؟
وهو احنا زى ما احنا ولا احنا مش عارفيين؟!
هو احنا بتوع السبحة..ولا بتوع الجلّبية..ولا الدقن الخفيفة..ولا اللى اسمها مدنية؟
وفى عندك الشيوعية..وخالتك ليبرالية..واخواننا النص نص..والرّكَ يا بويا ع النية
والنية ايه والقصد فين..فى حد عنده إجابة؟
محدش فاهم يفهمنى والنبى أنا والغلابة!
انا كمان حاسه ان اللهو الخفى بيلعب معانا لعبة احنا مش شايفنها و لو إنى مبحبش احقر من قدرتنا على اننا نقدر بعون الله نخلى الخفى ده يبقى فرجة للناس كلها و يبقى مجرد لهو :))
ReplyDeleteبعون الله نقدر طبعا، بس التحدى مش بس المتأمرون ولكن أخلاق وطريقة تفكير ليس صحيحا أن الثورة غيرتها وأنها قادرة على تغييرها أوتوماتيكيا، بل هو واجب لم نعمله قبل الثورة وهو ما زال علينا بعدها. ه
ReplyDeleteومنها كما يشير الكلام هنا، أننا كلنا نتكلم ولا أحد يستمع، والكل يغيرون مواقفهم ويسعون لمصالحهم. ه
وقبل كل ذلك أننا يجب أن نتفق على ما نريد--على الوجهة، وهو الأمر الأهم الذى وددت لو حققناه ولكن ذلك موضوع أخر وأكبر وأكثر تعقيدا؛ إلا عونا من الله
;-)
بالتأكيد احنا مش هنتغير من جميع الجوانب بسرعةعشان احنا عندنا إرث سيئ بجد , بس على الأقل اللى كان فاهم منا وسلبى هيحاول يبقى إيجابى و اللى ما كانش فاهم حاجة أصلا هيبتدى يقرا واللى مش متعلم المفروض يسعى انه يتعلم و فى ناس هتفضل زى ما هيه , فاهم قصدى كل واحد حسب هو شايف دنيته ازاى
ReplyDeleteاما بالنسبة ان كلنا بنتكلم و محدش بيسمع فده كبت صدقنى الشعب ده قعد ساكت 30 سنة :))
و حتى طرح جميع الأفكار يمكن ملخبطنا عشان احنا بس مش متعودين على كده. و الناس أصحاب المصالح فدول موجودين فى كل زمان , أمر واقع المهم ناخد بالنا منهم و نضيق عليهم و ربنا كريم
ماشى،المهم إن فى حد فاهم ودى إجابة السؤال الأساسى فى الموضوع دة، أنا حبيت أطمن بس
ReplyDelete:-]